ಚೀನಾದ ಕೊರೊನಾ ಹೀರೊ
- ಕೇಶವ ಪ್ರಸಾದ್‌ ಬಿ
ಚೀನಾದ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಕಳೆದ ಫೆಬ್ರವರಿಯಲ್ಲಿ ಕೊರೊನಾ ವೈರಸ್‌ ವಿರುದ್ಧ ಹೋರಾಟದಲ್ಲಿ ತಮ್ಮನ್ನು ತಾವೇ ‘‘ಸುಪ್ರೀಂ ಕಮಾಂಡರ್‌’’ ಎಂದು ಬೆನ್ನು ತಟ್ಟಿಕೊಂಡಿದ್ದರು. ಆದರೆ ನಿಜಕ್ಕೂ ಅಲ್ಲಿನ ಜನರ ಮನಗೆದ್ದ ಸಮರ ಸೇನಾನಿ ಅವರಲ್ಲ, ಬದಲಿಗೆ 83 ವರ್ಷದ ವೈದ್ಯ ಜಾಂಗ್‌ ನಾನ್‌ಶಾನ್‌!
ಇದಕ್ಕೆ ಕಾರಣಗಳೂ ಹಲವು. ಅವರು ಕೇವಲ ಹಿರಿಯ ವೈದ್ಯರಲ್ಲ, ಜ್ಞಾನ ವೃದ್ಧ, ಸತ್ಯನಿಷ್ಠ ಎಂಬ ಮಾತಿದೆ. ಜತೆಗೆ ಚೀನಾದ ನ್ಯಾಶನಲ್‌ ಪೀಪಲ್ಸ್‌ ಕಾಂಗ್ರೆಸ್‌ನ ಪ್ರತಿನಿಧಿ. ಚೀನಿ ಸರಕಾರಕ್ಕೆ ವೈದ್ಯಕೀಯ ಸಲಹೆಗಾರ. ಕಳೆದ ಮೂರು ತಿಂಗಳಿನಲ್ಲಿ ಚೀನಾದಲ್ಲಿ ಕೋವಿಡ್‌-19 ಹತ್ತಿಕ್ಕುವಲ್ಲಿ ನಡೆದ ಯುದ್ಧೋಪಾದಿ ಕಾರ್ಯಾಚರಣೆಗಳ ಹಿಂದಿನ ಪ್ರಮುಖ ವೈದ್ಯ ಡಾ. ಜಾಂಗ್‌!
ಕೊರೊನಾ ವೈರಸ್‌ ಕುರಿತ ರಾಷ್ಟ್ರೀಯ ತನಿಖೆಯ ನೇತೃತ್ವವನ್ನು ಅವರಿಗೆ ವಹಿಸಲಾಗಿದೆ. ಚೀನಿ ವೈದ್ಯರ ತಂಡ ಜಾಂಗ್‌ ನೇತೃತ್ವದಲ್ಲಿ ಕೊರೊನಾ ಕುರಿತ ಸಂಶೋಧನೆಗಳನ್ನು ಮುಂದುವರಿಸಿದೆ. ವಿಶೇಷವೇನೆಂದರೆ ಇದೇ ಜಾಂಗ್‌ ಈ ಹಿಂದೆ 2003ರಲ್ಲಿ ಚೀನಾವನ್ನು ಕಾಡಿದ್ದ ಸಾರ್ಸ್‌ ವೈರಾಣುವಿನ ಪತ್ತೆ ಮತ್ತು ನಿಯಂತ್ರಣದಲ್ಲಿನಿರ್ಣಾಯಕ ಪಾತ್ರ ವಹಿಸಿ, ಅಂತಾರಾಷ್ಟ್ರೀಯ ಗಮನ ಸೆಳೆದಿದ್ದರು. 17 ವರ್ಷಗಳ ನಂತರ ಮತ್ತೊಮ್ಮೆ ಕೊರೊನಾ ಮಾರಿಯನ್ನು ಹತ್ತಿಕ್ಕಲು ಮಧ್ಯ ಪ್ರವೇಶಿಸಿದ್ದಾರೆ. ವೈರಸ್‌ ಪ್ರತ್ಯಕ್ಷವಾದ ವುಹಾನ್‌ ನಗರದಲ್ಲೂ ದಣಿವರಿಯದೆ ಓಡಾಡಿ ವೈದ್ಯಕೀಯ, ಸಾಮಾಜಿಕ ಪರಿಹಾರೋಪಾಯಗಳನ್ನು ನಿರ್ದೇಶಿಸಿದ ಡಾಕ್ಟರ್‌ ಇವರೇ. ಒಂದು ಕಡೆ ಸರಕಾರಿ ಆರೋಗ್ಯ ಪಡೆಗಳ ಜತೆ ಮೀಟಿಂಗ್‌, ವುಹಾನ್‌ನಲ್ಲಿ ರೋಗಿಗಳಿಗೆ ಚಿಕಿತ್ಸೆ, ಸ್ಥಳಪರಿಶೀಲನೆ ಮತ್ತೊಂದು ಕಡೆ ದೂರವಾಣಿ ಸಂಭಾಷಣೆ, ಸುದ್ದಿಗೋಷ್ಠಿಯಲ್ಲಿ ಸುದ್ದಿಗಾರರ ನೂರೆಂಟು ಪ್ರಶ್ನೆಗಳಿಗೆ ಉತ್ತರ ಕೊಡುವುದು, ಸಂದರ್ಶನ ಹೀಗೆ ಬಿಡುವಿಲ್ಲದ ವ್ಯಕ್ತಿ ಜಾಂಗ್‌. ಚೀನಾದಲ್ಲಿ ಫೆಬ್ರವರಿಯಲ್ಲಿ ಕೊರೊನಾ ತಾಂಡವವಾಡಲಿದೆ ಎಂದವರು ಜನವರಿಯಲ್ಲಿ ಭವಿಷ್ಯ ನುಡಿದಿದ್ದರು. ಹೀಗಾಗಿ ಅಂದಿನ ಸಾರ್ಸ್‌ ಹೀರೊ, ಇಂದಿನ ಕೊರೊನಾ ಹೀರೊ ಆಗಿ ಹೊರ ಹೊಮ್ಮಿದ್ದಾರೆ!
ಜಾಂಗ್‌ ಕೋವಿಡ್‌-19 ವಿರುದ್ಧದ ಹೋರಾಟಕ್ಕಿಳಿದಾಗ ಚೀನಿ ಮಾಧ್ಯಮಗಳು ಸಾರ್ಸ್‌ ಹೀರೊ ಪುನರಾಗಮನ ಎಂದು ಬಣ್ಣಿಸಿದ್ದವು. ‘‘ ಏಪ್ರಿಲ್‌ ಅಂತ್ಯದ ವೇಳೆಗೆ ಕೊರೊನಾ ವೈರಸ್‌ ಸೃಷ್ಟಿಸಿರುವ ಸಾಂಕ್ರಾಮಿಕ ರೋಗ ನಿಯಂತ್ರಣಕ್ಕೆ ಬರಲಿದೆ. ಆದರೆ ಇದಕ್ಕೆ ಇದಕ್ಕಾಗಿ ಪ್ರತಿಯೊಂದು ರಾಷ್ಟ್ರವೂ ಕಟ್ಟುನಿಟ್ಟಿನ ಕ್ರಮಗಳನ್ನು ಜಾರಿಗೊಳಿಸಬೇಕು. ಮಾತ್ರವಲ್ಲದೆ ಅಮೆರಿಕ ಒಂದು ವೇಳೆ ಕೋವಿಡ್‌-19 ಹತ್ತಿಕ್ಕುವಲ್ಲಿ ವಿಫಲವಾದರೆ ಇಡೀ ವಿಶ್ವಕ್ಕೇ ವಿಪತ್ತು ಕಾಡಲಿದೆ’’ ಎಂದು ಭರವಸೆಯ ಜತೆಗೆ ಎಚ್ಚರಿಸಿರುವುದು ಜಗತ್ತಿನಾದ್ಯಂತ ಸುದ್ದಿಯಾಗಿದೆ.
ಚೀನಾದ ಪ್ರಮುಖ ವೈದ್ಯಕೀಯ ಸಲಹೆಗಾರ, ಡಾ. ಜಾಂಗ್‌ ನಾನ್‌ಶಾನ್‌ ಜನವರಿ 20ರಂದು ಚೀನಾದ ಟಿ.ವಿಗಳಿಗೆ ನೀಡಿದ ಸಂದರ್ಶನದಲ್ಲಿ, ‘‘ಹೊಸ ಕೊರೊನಾ ವೈರಸ್‌ ವ್ಯಕ್ತಿಯಿಂದ ವ್ಯಕ್ತಿಗೆ ಹರಡುತ್ತಿದ್ದು, ವೇಗವಾಗಿ ಸಾಂಕ್ರಾಮಿಕವಾಗಬಹುದು. ಹೀಗಾಗಿ ಸಾರ್ವಜನಿಕರು ಬಹಳ ಎಚ್ಚರಿಕೆಯಿಂದ ಇರಬೇಕು. ಮುಖ್ಯವಾಗಿ ಸಾಮಾಜಿಕ ಅಂತರವನ್ನು ಚಾಚೂ ತಪ್ಪದೆ ಪಾಲಿಸ ಬೇಕು. ಇದಕ್ಕೆ ಬೇರೆ ಮದ್ದಿಲ್ಲ’’ಎಂದು ಎಚ್ಚರಿಸಿದ್ದರು.
ಚೀನಾದಲ್ಲಿ ಮೊದಲ ಬಾರಿಗೆ ಕೊರೊನಾ ವೈರಸ್‌ ಹರಡುತ್ತಿರುವ ಬಗ್ಗೆ ಸರಕಾರವನ್ನು ಎಚ್ಚರಿಸಿ ಕೊನೆಗೆ ಅದಕ್ಕೇ ಬಲಿಯಾದವರು ಡಾ. ಲಿ ವೆನ್‌ ಲಿಯಾಂಗ್‌. ಆಗ ಸಾರ್ವಜನಿಕರ ಶೋಕ, ತಲ್ಲಣಗಳಿಗೆ ಸ್ಪಂದಿಸಿ, ಅದನ್ನು ಉಪಶಮನಗೊಳಿಸಿದ್ದ ಜಾಂಗ್‌, ‘‘ಚೀನಾದ ನಿಜವಾದ ಹೀರೊ ಡಾಕ್ಟರ್‌ ಲಿ ವೆನ್‌ಲಿಯಾಂಗ್‌. ಡಿಸೆಂಬರ್‌ನಲ್ಲೇ ಅವರು ಸತ್ಯವನ್ನು ಹೇಳಿದ್ದರು. ಅವರ ಬಗ್ಗೆ ನನಗೆ ಹೆಮ್ಮೆ ಇದೆ’’ ಎಂದಿದ್ದರು. 2003ರಲ್ಲಿ ಸಾರ್ಸ್‌ ವೈರಾಣು ಹರಡುತ್ತಿದ್ದರೂ, ಆರೋಗ್ಯ ಅಧಿ ಕಾರಿಗಳು ಸಾರ್ವಜನಿಕ ವಿಶ್ವಾಸವನ್ನು ಮರು ಸ್ಥಾಪಿಸಲು ಪರಿಸ್ಥಿತಿ ನಿಯಂತ್ರಣದಲ್ಲಿಇದೆ ಎಂದು ಘೋಷಿಸಿದ್ದರು. ಆದರೆ ಅದನ್ನು ದಿಟ್ಟತನದಿಂದ ವಿರೋಧಿಸಿದ್ದರು ಜಾಂಗ್‌.
ವೈರಾಣು ಈಗಲೂ ಹರಡುತ್ತಿರುವಾಗ ನಿಯಂತ್ರಣದಲ್ಲಿದೆ ಎನ್ನುವುದು ಹೇಗೆ? ಎಂದು ಸುದ್ದಿಗೋಷ್ಠಿಯೊಂದರಲ್ಲೇ ಪ್ರಶ್ನಿಸಿದ್ದರು. ವಸ್ತುಸ್ಥಿತಿಯ ಸಮಗ್ರತೆ ಯನ್ನು ಬಚ್ಚಿಡುವುದು ಅವರಿಗೆ ಇಷ್ಟವಿರಲಿಲ್ಲ. ‘‘ ಪ್ರಾಮಾಣಿಕತೆ ಮುಖ್ಯ. ಜನರಿಗೆ ಸತ್ಯ ಗೊತ್ತಾಗಬೇಕು. ಅದನ್ನು ಮುಚ್ಚಿಡುವುದರಿಂದ ಮತ್ತಷ್ಟು ಭಯವಾದೀತೇ ಹೊರತು ಸಾಮಾಜಿಕ ಸ್ಥಿರತೆ ಅಸಾಧ್ಯ’’ ಎಂದು ಸಾರ್ಸ್‌ ವೈರಸ್‌ ಪಿಡುಗಿನಿಂದ ಕಲಿತ ಪಾಠವನ್ನು ಬಣ್ಣಿಸಿದ್ದಾರೆ ಜಾಂಗ್‌. ಹೀಗೆ ತಮ್ಮ ಪಕ್ಷ ಸಾರ್ಸ್‌ ವಿಷಯವನ್ನು ತಣ್ಣಗಿಡಲು ಯತ್ನಿಸಿದಾಗ ಆಕ್ಷೇಪಿಸಿದ್ದರು. ಯಾವಾ ಗಲೂ ಸತ್ಯವನ್ನು ಹೇಳಬೇಕು ಎಂದು ಅವರ ತಂದೆ ಬೋಧಿ ಸುತ್ತಿದ್ದರು ಎನ್ನುತ್ತಾರೆ ಅವರು. ಸಾರ್ಸ್‌ ವೈರಸ್‌ಗೆ ಸಾಂಪ್ರದಾಯಿಕ ಚಿಕಿತ್ಸೆಯೇ ಸಾಕು ಎಂದು ಆರಂಭದಲ್ಲಿಇತರ ವೈದ್ಯರು ಭಾವಿಸಿದ್ದರೆ, ಜಾಂಗ್‌ ಭಿನ್ನ ನಿಲುವು ವ್ಯಕ್ತಪಡಿಸಿದ್ದರು. ಇದು ಕೊರೊನಾ ವೈರಸ್‌ ಮಾದರಿಯದ್ದು ಎಂದು ಹೇಳಿದ್ದರು. ಈ ರೀತಿಯ ದೂರದೃಷ್ಟಿ ಅವರಲ್ಲಿ ಮೊದಲೇ ಇತ್ತು. ಸಾರ್ಸ್‌ ವೈರಸ್‌ ಬಗ್ಗೆ ಹೆಚ್ಚಿನ ತಿಳಿವಳಿಕೆಗೆ ಜಾಂಗ್‌ ಸಂಶೋ ಧನೆಗಳು ನೆರವಾಗಿರುವುದನ್ನು ವಿಶ್ವ ಆರೋಗ್ಯ ಸಂಸ್ಥೆ ಕೂಡ ಸ್ಮರಿಸಿದೆ.
ಚೀನಾದ ನಾನ್‌ಜಿಂಗ್‌ ಎಂಬಲ್ಲಿ 1936ರಲ್ಲಿ ಜನಿಸಿದ ಜಾಂಗ್‌ ಅವರ ಕುಟುಂಬ ವೈದ್ಯಕೀಯ ಹಿನ್ನೆಲೆ ಉಳ್ಳದ್ದು. ಅವರ ತಂದೆ ಜಾಂಗ್‌ ಶಿಫಾನ್‌ ಮಕ್ಕಳ ವೈದ್ಯರಾಗಿದ್ದರು. 2010ರಲ್ಲಿ ಚೀನಾದ ಟಾಪ್‌ 10 ವೈದ್ಯರಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದರು. ಬೀಜಿಂಗ್‌ ವೈದ್ಯಕೀಯ ವಿವಿಯಲ್ಲಿ ಓದಿರುವ ಅವರು ಶ್ವಾಸಕೋಶ ತಜ್ಞರು. ಅಸ್ತಮಾ ರೋಗ ನಿಯಂತ್ರಣದ ಬಗ್ಗೆ ಆಳವಾದ ಸಂಶೋಧನೆ ನಡೆಸಿದ್ದಾರೆ. ಲಂಡನ್‌ನಲ್ಲಿ ಉನ್ನತ ಮಟ್ಟದ ವೈದ್ಯಕೀಯ ಶಿಕ್ಷಣ ಗಳಿಸಿದ್ದಾರೆ. 1981ರಲ್ಲಿ ಯೂನಿವರ್ಸಿಟಿ ಆಫ್‌ ಎಡಿನ್‌ಬರ್ಗ್‌ ಮೆಡಿಕಲ್‌ ಸ್ಕೂಲ್‌ನಲ್ಲಿ ಎಂಡಿ ಗಳಿಸಿದ್ದರು. 2000ರಲ್ಲಿ ಚೈನೀಸ್‌ ಥೊರಾಸಿಸ್‌ ಸೊಸೈಟಿಯ ಅಧ್ಯಕ್ಷರಾಗಿದ್ದರು. ಚೈನೀಸ್‌ ಅಕಾಡೆಮಿ ಆಫ್‌ ಎಂಜಿನಿಯರಿಂಗ್‌ನಲ್ಲಿ ಪ್ರೊಫೆಸರ್‌ ಆಗಿ ಸೇವೆ ಸಲ್ಲಿಸಿದ್ದಾರೆ. 2005-09ರಲ್ಲಿ ಚೈನೀಸ್‌ ಮೆಡಿಕಲ್‌ ಅಸೋಸಿಯೇಶನ್‌ನ ಅಧ್ಯಕ್ಷರಾಗಿದ್ದರು. ಪ್ರಸ್ತುತ ಗುಯಾಂಗ್‌ಜೊ ಇನ್‌ಸ್ಟಿಟ್ಯೂಟ್‌ ಆಫ್‌ ರೆಸ್ಪಾರೇಟರಿ ಡಿಸೀಸ್‌ನ ಅಧ್ಯಕ್ಷರಾಗಿದ್ದಾರೆ. ಜತೆಗೆ ಜರ್ನಲ್‌ ಆಫ್‌ ಥೊರಾಸಿಸ್‌ ಡಿಸೀಸ್‌ನ ಪ್ರಧಾನ ಸಂಪಾದಕ.
ಸಾರ್ವಜನಿಕ ಆರೋಗ್ಯ ವಿಚಾರಗಳಲ್ಲಿ ನೇರವಾಗಿ, ದಿಟ್ಟತನ ದಿಂದ ಮಾತನಾಡುವುದು ಅವರ ಸ್ವಭಾವ. ‘‘ ಸೇವಿಸುವ ಆಹಾರ, ನೀರು, ವಾಯು ಎಲ್ಲವೂ ಕಲುಷಿತವಾಗಿರುವಾಗ ಜಿಡಿಪಿಯಲ್ಲಿ ಎಷ್ಟು ಮುಂಚೂಣಿಯಲ್ಲಿದ್ದರೇನು ಪ್ರಯೋಜನ?’’ ಎಂದು ಸಂದರ್ಶನವೊಂದರಲ್ಲಿ ಜಾಂಗ್‌ ಪ್ರಶ್ನಿಸಿದ್ದರು. ಕೋವಿಡ್‌-19 ವೈರಸ್‌, ಸಾರ್ಸ್‌ ವೈರಸ್‌ನಂತೆ ಹೋಗುವಂಥದ್ದಲ್ಲ. ಆರಂಭಿಕ ಪತ್ತೆ ಹಾಗೂ ಹರಡದಂತೆ ತಡೆಯುವುದು ಇದಕ್ಕೆ ಮದ್ದು. ಲಾಕ್‌ ಡೌನ್‌ ಅತ್ಯಂತ ಪರಿಣಾಮಕಾರಿ ಎನ್ನುವುದು ಜಾಂಗ್‌ ಸಲಹೆ. ಹೀಗಿದ್ದರೂ, ಕೊರೊನಾ ವೈರಸ್‌ಅನ್ನು ಚೀನಾದ ವುಹಾನ್‌ ನಗರದಲ್ಲಿ ಸೃಷ್ಟಿಸಲಾಗಿದೆ ಎಂಬ ಆರೋಪಗಳನ್ನು ಅವರು ನಿರಾಕರಿಸುತ್ತಾರೆ. ಕೋವಿಡ್‌-19 ಮೊದಲ ಬಾರಿಗೆ ವುಹಾನ್‌ನಲ್ಲಿ ಕಾಣಿಸಿರಬಹುದು. ಹಾಗಂತ ಅದು ಅಲ್ಲಿಯೇ ಸೃಷ್ಟಿಯಾಗಿದ್ದಲ್ಲ ಎಂಬುದು ಅವರ ನಿಲುವು. ಡಾ. ಜಾಂಗ್‌ ಕ್ರೀಡೆಗಳಲ್ಲೂಆಸಕ್ತರು. 1959ರಲ್ಲಿ ನಡೆದ ಕ್ರೀಡಾಕೂಟದಲ್ಲಿ 400 ಮೀಟರ್‌ ಓಟದ ಸ್ಪರ್ಧೆಯಲ್ಲಿ ರಾಷ್ಟ್ರೀಯ ದಾಖಲೆಯನ್ನು ಮುರಿದಿದ್ದರು.
