ಅಮೆರಿಕ ಹಾಗೂ ಚೀನ ದೇಶಗಳ ನಡುವಿನ ವೈಷಮ್ಯ ದಿನೇ ದಿನೆ ಉಲ್ಬಣಿಸುತ್ತಿದೆ. ಉಭಯ ದೇಶಗಳ ವೈಷಮ್ಯಕ್ಕೆ ಕಾರಣವಾದ ಬೆಳವಣಿಗೆಗಳೇನು? ಅವು ಹೇಗೆ ಮುಂದುವರಿದಿವೆ?
ರಾಯಭಾರ ಕಚೇರಿಗಳು ಕ್ಲೋಸ್‌
ಎರಡು ದಿನ ಹಿಂದೆ, ಚೀನಾದ ರಾಯಭಾರ ಕಚೇರಿಯ ಮೂಲಕ ನಮ್ಮ ದೇಶದ ರಹಸ್ಯಗಳನ್ನು ಅಲ್ಲಿಗೆ ಕದ್ದು ಸಾಗಿಸಲಾಗುತ್ತಿದೆ ಎಂದು ಆರೋಪಿಸಿದ ಅಮೆರಿಕ, ಹ್ಯೂಸ್ಟನ್‌ನಲ್ಲಿದ್ದ ಆ ಕಚೇರಿಯನ್ನು ಮುಚ್ಚಿಸಿತು. ಇದಕ್ಕೆ ಪ್ರತಿಯಾಗಿ, ಚೆಂಗ್ಡುವಿನಲ್ಲಿದ್ದ ಅಮೆರಿಕದ ರಾಯಭಾರಿ ಕಚೇರಿಯನ್ನು ಚೀನಾ ಮುಚ್ಚಿಸಿದೆ. ಇದಕ್ಕೂ ಮೊದಲು, ಚೀನಾದ ಇಬ್ಬರು ಪ್ರಜೆಗಳು ತನ್ನ ಮಿಲಿಟರಿ ರಹಸ್ಯಗಳ ಬೇಹುಗಾರಿಕೆ ನಡೆಸುತ್ತಿದ್ದಾರೆ ಎಂದು ಅಮೆರಿಕ ಹೇಳಿತ್ತಲ್ಲದೆ, ಹಲವು ಚೀನಿ ಪ್ರಜೆಗಳ ಮೇಲೆ ಕಾನೂನು ಕ್ರಮ, ಚೀನಾದ ಆಡಳಿತ ಪಕ್ಷದ ಯಾವುದೇ ಸದಸ್ಯನಿಗೆ ದೇಶದೊಳಗೆ ನಿಷೇಧ ಮುಂತಾದ ಕ್ರಮ ಕೈಗೊಳ್ಳಲೂ ಮುಂದಾಗಿದೆ. ಉಭಯ ದೇಶಗಳ ರಾಜತಾಂತ್ರಿಕ ಕಚೇರಿಗಳು ನಾಲ್ಕು ದಶಕಗಳಿಂದ ಕಾರ್ಯಾಚರಿಸುತ್ತಿದ್ದು, ಇವು ಮುಚ್ಚಿದರೆ ಮಾತುಕತೆ ಸಾಧ್ಯವಾಗದ ಸ್ಥಿತಿಗೆ ತಲುಪಲಿವೆ.
ದಕ್ಷಿಣ ಚೀನಾ ಸಮುದ್ರದ ತಗಾದೆ
ದಕ್ಷಿಣ ಚೀನಾ ಸಮುದ್ರದಲ್ಲಿ ಜಗತ್ತಿನ ಎಲ್ಲ ದೇಶಗಳ ಸುಮಾರು ಶೇ.40 ವಾಣಿಜ್ಯ ವಹಿವಾಟಿನ ಹಡಗುಗಳು ಓಡಾಡುತ್ತವೆ. ಆದರೆ ಈ ಪ್ರದೇಶದ ಸಂಪೂರ್ಣ ಸ್ವಾಮ್ಯ ತನ್ನದೇ ಎಂಬುದು ಚೀನಾದ ವಾದ. ಕಳೆದ ವಾರ ಈ ಸಮುದ್ರದಲ್ಲಿ ಅಮೆರಿಕದ ಎರಡು ಬೃಹತ್‌ ಜೆಟ್‌ ಫೈಟರ್‌ ಕ್ಯಾರಿಯರ್‌ ನೌಕೆಗಳು ಡ್ರಿಲ್‌ ನಡೆಸಿವೆ. ಪೆಸಿಫಿಕ್‌ ಒಪ್ಪಂದದ ರಾಷ್ಟ್ರಗಳಾದ ಆಸ್ಪ್ರೇಲಿಯ ಮತ್ತು ಜಪಾನ್‌ ಅಮೆರಿಕವನ್ನು ಈ ವಿಚಾರದಲ್ಲಿ ಬೆಂಬಲಿಸಿವೆ. ಗಲ್ವಾನ್‌ನಲ್ಲಿ ಚೀನಾ ತೆಗೆದ ಕ್ಯಾತೆಗೆ ಪ್ರತಿಯಾಗಿ, ಭಾರತಕ್ಕೆ ತನ್ನ ಬೆಂಬಲವನ್ನು ಅಮೆರಿಕ ಘೋಷಿಸಿದೆ.
ತೈವಾನ್‌ ಮತ್ತು ಹಾಂಕಾಂಗ್‌
ಹಾಂಕಾಂಗ್‌, ಚೀನಾದ ಆಡಳಿತ ಹೊಂದಿರುವ ಸ್ವಾಯತ್ತ ಪ್ರಾಂತ್ಯ. ಇಲ್ಲಿನ ಪ್ರಜಾಪ್ರಭುತ್ವವಾದಿ ಚಳವಳಿಗೆ ಅಮೆರಿಕ ತನ್ನ ಬೆಂಬಲವನ್ನು ಘೋಷಿಸಿದೆ. ತೈವಾನ್‌ಗೆ ಮಿಲಿಟರಿ ಬೆಂಬಲವನ್ನು ಅಮೆರಿಕ ನೀಡುತ್ತಿದೆ. ಟಿಬೆಟ್‌ನಲ್ಲಿ ದಬ್ಬಾಳಿಕೆ ನಡೆಸುವ ಹಾಗೂ ಚೀನಾದ ಅಲ್ಪಸಂಖ್ಯಾತ ಉಯಿಘುರ್‌ ಮುಸ್ಲಿಮರ ಮೇಲೆ ದೌರ್ಜನ್ಯ ನಡೆಸುವ ಚೀನಾ ಅಧಿಕಾರಿಗಳನ್ನು ಶಿಕ್ಷಿಸುವುದಾಗಿ ಅಮೆರಿಕ ಹೇಳಿದೆ. ಇದೆಲ್ಲ ಚೀನಾವನ್ನು ಕೆರಳಿಸಿವೆ.
ಪತ್ರಕರ್ತರಿಗೆ ನಿರ್ಬಂಧ
ಅಮೆರಿಕ, ಚೀನಾದ ಗ್ಲೋಬಲ್‌ ಡೇಲಿ ಮುಂತಾದ ಪತ್ರಿಕೆಗಳ ಹಾಗೂ ಇತರ ಚೀನೀ ಪತ್ರಕರ್ತರ ವೀಸಾ ರದ್ದುಪಡಿಸಿದ್ದರೆ, ಚೀನಾ, ಅಮೆರಿಕದ ನ್ಯೂಯಾರ್ಕ್‌ ಟೈಮ್ಸ್‌, ವಾಷಿಂಗ್ಟನ್‌ ಪೋಸ್ಟ್‌ ಮುಂತಾದ ಪತ್ರಿಕೆಗಳ ಪತ್ರಕರ್ತರನ್ನು ಹೊರಗಟ್ಟಿದೆ. ಚೀನಾದ ಪೀಪಲ್ಸ್‌ ಲಿಬರೇಶನ್‌ ಆರ್ಮಿಯ ಜೊತೆಗೆ ಸಂಬಂಧ ಹೊಂದಿರುವ ವಿಶ್ವವಿದ್ಯಾಲಯಗಳಿಂದ ತನ್ನಲ್ಲಿಗೆ ಕಲಿಕೆಗೆ ಬಂದಿರುವ ವಿದ್ಯಾರ್ಥಿಗಳ ವೀಸಾಗಳನ್ನು ಅಮೆರಿಕ ರದ್ದುಪಡಿಸಿದೆ.
ತಂತ್ರಜ್ಞಾನ ಸಮರ
ತನ್ನಲ್ಲಿನ ಯಾವುದೇ ಕಂಪನಿ ಚೀನಾ ನಿರ್ಮಿತ ಟೆಲಿಕಾಂ ಉತ್ಪನ್ನಗಳನ್ನು ಬಳಸದಂತೆ ಅಮೆರಿಕ ನಿರ್ಬಂಧಿಸಿದೆ. ಅಮೆರಿಕದ ಪ್ರಮುಖ 5ಜಿ ಕಂಪನಿ ಹುವೆಯಿಯನ್ನು ದೇಶದಿಂದ ಆಚೆಗಟ್ಟಲಾಗಿದೆ. ಹಲವು ಚೀನಾ ಆ್ಯಪ್‌ಗಳನ್ನು ಬ್ಯಾನ್‌ ಮಾಡಿದೆ. ಚೀನಾದಲ್ಲಿ, ಅಮೆರಿಕ ಮೂಲದ ಫೇಸ್‌ಬುಕ್‌ನಂಥ ವೆಬ್‌ಸೈಟ್‌ಗಳಿಗೆ ಮೊದಲಿನಿಂದಲೂ ಪ್ರವೇಶವಿಲ್ಲ. ಉಭಯ ದೇಶಗಳೂ ತಮ್ಮ ರಹಸ್ಯಗಳಿಗೆ ಎದುರಾಳಿಯ ಹ್ಯಾಕರ್‌ಗಳು ಕನ್ನ ಹಾಕುತ್ತಿದ್ದಾರೆ ಎಂದು ಆರೋಪಿಸಿವೆ.
ಚೀನಾದ ಸಾಲದ ವ್ಯಾಪಾರ
ಚೀನಾದ ಬಗ್ಗೆ ಅಮೆರಿಕದ ಆತಂಕ 2005ನೇ ಇಸವಿಯಿಂದಲೇ ಆರಂಭವಾಗಿತ್ತು. ಅದಾಗಲೇ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚೀನಾ ತನ್ನ ಪ್ರಭಾವವನ್ನು ತೋರಿಸಲು ಆರಂಭಿಸಿತ್ತು. ಐಟಿ ಸೇವಾ ವಲಯ, ದೂರಸಂಪರ್ಕ ಕ್ಷೇತ್ರಗಳಲ್ಲಿ ಚೀನಾ ಕ್ರಾಂತಿಯನ್ನೇ ಸಾಧಿಸಿತ್ತು. ಅಮೆರಿಕದ ಕಾಲ್‌ ಸೆಂಟರ್‌ಗಳಲ್ಲಿ ಭಾರತದ ಉದ್ಯೋಗಿಗಳ ಜೊತೆಗೆ ಚೀನಾದವರೂ ಸಾಕಷ್ಟು ಪೈಪೋಟಿ ಒಡ್ಡಿದ್ದರು. ದಿನನಿತ್ಯದ ಸಾಮಗ್ರಿಗಳು, ಆಟಿಕೆಗಳು, ಇಲೆಕ್ಟ್ರಾನಿಕ್‌ ಉಪಕರಣಗಳ ಉತ್ಪಾದನೆಯಲ್ಲಿ ಕ್ರಾಂತಿಯನ್ನೇ ಮಾಡಿದ್ದ ಚೀನಾ, ತನ್ನ ಉತ್ಪನ್ನಗಳನ್ನು ಪ್ರವಾಹದಂತೆ ಯುರೋಪ್‌, ಅಮೆರಿಕ ಹಾಗೂ ಮೂರನೇ ಜಗತ್ತಿನ ದೇಶಗಳಿಗೆ ಕಳಿಸುತ್ತಿತ್ತು. ಅತ್ಯಂತ ಅಗ್ಗವಾಗಿ ಸಿಗುತ್ತಿದ್ದ ಈ ಸಾಮಗ್ರಿಗಳ ಮುಂದೆ ಎಲ್ಲ ದೇಶಗಳ ಸ್ಥಳೀಯ ಉತ್ಪಾದನೆಗಳು ಮಂಕಾದವು. ಮಾರುಕಟ್ಟೆಯಲ್ಲಿ ಚೀನಾ ಏಕಸ್ವಾಮ್ಯ ಸಾಧಿಸಿತು. ಇದೇ ವೇಳೆಗೆ ಬರ್ಮಾ, ಶ್ರೀಲಂಕಾ, ಪಾಕಿಸ್ತಾನ ಮುಂತಾದ ಬಡ ದೇಶಗಳಿಗೆ ಸಾಕಷ್ಟು ಸಾಲ ಕೊಟ್ಟು, ಅವುಗಳನ್ನು ತನ್ನ ತೆಕ್ಕೆಗೆ ಚೀನಾ ತೆಗೆದುಕೊಂಡಿತು. ನಿಧಾನವಾಗಿ ಅಮೆರಿಕದ ಬಂಡವಾಳಶಾಹಿ ಹಿಡಿತ ಕಳೆದುಕೊಳ್ಳುತ್ತಿರುವಂತೆ ಅಮೆರಿಕಕ್ಕೆ ಆತಂಕ ಆರಂಭವಾಯಿತು. ಅದು ಈಗ ಡೊನಾಲ್ಡ್‌ ಟ್ರಂಪ್‌ ಅವರ ಅಧ್ಯಕ್ಷತೆಯಲ್ಲಿ ಆಕ್ರೋಶವಾಗಿ ಪರಿವರ್ತಿತವಾಗಿದೆ.
ಟ್ರಂಪ್‌ ನೇತೃತ್ವದಲ್ಲಿ ವಾರ್‌
2016ರಲ್ಲಿ ಚೀನಾ ಹಾಗೂ ಅಮೆರಿಕದ ನಡುವೆ ಟ್ರೇಡ್‌ ವಾರ್‌ ಅರ್ಥಾತ್‌ ವ್ಯಾಪಾರ ಸಮರ ಆರಂಭವಾಯಿತು. ಮೊದಲು, ಸದಸ್ಯರ ರಾಷ್ಟ್ರಗಳಿಗೆ ಭಾರಿ ಸಾಲ ನೀಡಿ ಅವರನ್ನು ಮುಜುಗರಕ್ಕೆ ಸಿಕ್ಕಿಸಿ ವ್ಯಾಪಾರ ಮಾಡುವ ಚೀನಾದ ವ್ಯಾಪಾರ ಪದ್ಧತಿ ಸರಿಯಿಲ್ಲವೆಂದು ಅಮೆರಿಕ ದೂಷಿಸಿತು. ನಂತರ ಚೀನಾದಿಂದ ಬರುತ್ತಿದ್ದ ಸಾಮಗ್ರಿಗಳಿಗೆ ದುಬಾರಿ ಸುಂಕವನ್ನು ಟ್ರಂಪ್‌ ವಿಧಿಸಿದರು. ಇದನ್ನು ಚೀನಾ ವಿರೋಧಿಸಿತು. ಅಮೆರಿಕದ ಸಾಮಗ್ರಿಗಳಿಗೆ ಅದೂ ದುಬಾರಿ ಸುಂಕ ಹಾಕಿತು. ಚೀನಾದ ಜೊತೆಗೆ ಹೆಚ್ಚಿನ ವ್ಯಾಪಾರ ಸಂಬಂಧ ಕಡಿದುಕೊಳ್ಳುವಂತೆ ಭಾರತವೂ ಸೇರಿ ಹಲವು ದೇಶಗಳಿಗೆ ಟ್ರಂಪ್‌ ಎಚ್ಚರಿಸಿದರು. ಇದಕ್ಕೆ ಪ್ರತಿಯಾಗಿ ದಕ್ಷಿಣ ಏಷ್ಯಾದ ರಾಷ್ಟ್ರಗಳ ಮುಕ್ತ ವ್ಯಾಪಾರ ಒಪ್ಪಂದವನ್ನು ಸಿದ್ಧಪಡಿಸಲು ಚೀನಾ ಆತುರ ಮಾಡಿತು. ಇದಕ್ಕೆ ಭಾರತ, ಜಪಾನ್‌ ಒಪ್ಪಲಿಲ್ಲ. ಚೀನಾದ ಜೊತೆಗಿನ ಎಲ್ಲ ವ್ಯಾಪಾರ ಸಂಬಂಧ ಕಡಿದುಕೊಳ್ಳಲು ಸಿದ್ಧ ಎಂದು ಟ್ರಂಪ್‌ ಹೇಳಿದ್ದಾರೆ.
ಹದಗೆಡಿಸಿದ ಕೊರೊನಾ
ವಾಣಿಜ್ಯ ಸಂಬಂಧಗಳನ್ನು ಇನ್ನಷ್ಟು ಕೆಡಿಸುವಂತೆ ಕೊರೊನಾ ವೈರಸ್‌ ಆಗಮಿಸಿತು. ಅಮೆರಿಕದಲ್ಲಿ ಒಂದು ಲಕ್ಷಕ್ಕೂ ಅಧಿಕ ಮಂದಿಯನ್ನು ಬಲಿ ತೆಗೆದುಕೊಂಡು ಆರ್ಥಿಕತೆಯನ್ನು ಪಾತಾಳಕ್ಕೆ ನೂಕಿತು. ಸಿಟ್ಟಿಗೆದ್ದ ಟ್ರಂಪ್‌, ಚೀನಾದಿಂದ ತಮ್ಮ ದೇಶದ ಎಲ್ಲ ಕಂಪನಿಗಳನ್ನು ಮರಳಿ ಕರೆಸಿಕೊಳ್ಳುವುದಾಗಿ ಗುಡುಗಿದರು. ಕೊರೊನಾ ವೈರಾಣುವನ್ನು ಅವರು ಕರೆಯುವುದೇ ‘ಚೀನಾ ವೈರಸ್‌’ ಎಂದು. ಈ ವೈರಸ್‌ ಸಾಮಾಜಿಕ- ಆರ್ಥಿಕವಾಗಿ ಉಂಟುಮಾಡಿರುವ ನಷ್ಟಕ್ಕೆ ಪ್ರತಿಯಾಗಿ ಪರಿಹಾರ ಪಡೆಯಲು ಕೇಸು ಹಾಕುವುದಾಗಿಯೂ ಅವರು ಬೆದರಿಸಿದ್ದರು. ವಿಶ್ವ ಆರೋಗ್ಯ ಸಂಸ್ಥೆಯಿಂಧ ತನಿಖೆಗೆ ಒತ್ತಾಯಿಸಿದರು.
ಭಾರತದ ಮೇಲೆ ಪರಿಣಾಮವೇನು?
ಚೀನಾ ಹಾಗೂ ಅಮೆರಿಕದ ನಡುವೆ ಶೀತಲ ಸಮರ ಆರಂಭವಾದರೆ ಭಾರತ ಸಹಜವಾಗಿ ಅಮೆರಿಕದ ಜೊತೆ ನಿಲ್ಲಬಹುದು. ಯಾಕೆಂದರೆ ಚೀನಾದ ಜೊತೆಗೆ ನಮ್ಮ ಸಂಬಂಧ ಕೆಟ್ಟಿದೆ. ಸೇವಾ ವಲಯದಲ್ಲಿ ಚೀನಾಕ್ಕೆ ಭಾರತ ಪೈಪೋಟಿ ನೀಡುತ್ತಿದೆ. ಅಮೆರಿಕದಲ್ಲಿ ಭಾರತದ ಸೇವಾ ವಲಯದ ಲಕ್ಷಾಂತರ ಮಂದಿ ದುಡಿಯುತ್ತಿದ್ದು, ಎರಡೂ ದೇಶಗಳ ಆರ್ಥಿಕತೆಗಳು ಪರಸ್ಪರ ಪೂರಕವಾಗಿ ನಡೆಯುತ್ತಿವೆ. ಭಾರತ ಅಮೆರಿಕದ ಪರ ನಿಂತರೆ ಚೀನಾ ನಮಗೆ ನೀಡುವ ಕಿರುಕುಳವನ್ನು ಹೆಚ್ಚಿಸಬಹುದು. ಅದಕ್ಕೆ ಪಾಕಿಸ್ತಾನ, ನೇಪಾಳಗಳ ಸಹಕಾರವನ್ನೂ ಪಡೆಯಬಹುದು.
ಉಭಯ ದೇಶಗಳ ಬಲಾಬಲ
ಚೀನಾ ಹಾಗೂ ಅಮೆರಿಕ ದೇಶಗಳ ಒಟ್ಟಾರೆ ವಾಣಿಜ್ಯ ವಹಿವಾಟು ಒಟ್ಟು ವಿಶ್ವದ ಶೇ.40ರಷ್ಟಿದೆ. ಹೀಗಾಗಿ ಉಭಯ ದೇಶಗಳ ಕಲಹವೆಂದರೆ ಇಡೀ ವಿಶ್ವಕ್ಕೇ ಚಿಂತೆಗೆ ಕಾರಣ. ಅಮೆರಿಕಕ್ಕೆ ಸಮಾನವಾದ ಮಿಲಿಟರಿ ಬಲ ಹೊಂದಿರುವ ಚೀನಾ, ಅದರಷ್ಟೇ ಬಲಿಷ್ಠವಾದ ಬಾಹ್ಯಾಕಾಶ ಸಾಮರ್ಥ್ಯ, ಬೆಂಬಲಿಗ ರಾಷ್ಟ್ರಗಳ ಪಡೆ ಇತ್ಯಾದಿಯನ್ನು ಹೊಂದಿದೆ. ಚೀನಾ ಮಾನವ ಸಂಪನ್ಮೂಲವನ್ನು ಸಮರ್ಥವಾಗಿ ಉಪಯೋಗಿಸುವಲ್ಲಿ ಹೆಸರು ಗಳಿಸಿದೆ. ಅಮೆರಿಕದ ಸಾಂಪ್ರದಾಯಿಕ ವೈರಿಗಳಾದ ಉತ್ತರ ಕೊರಿಯಾ, ಕ್ಯೂಬಾ, ಇರಾನ್‌ಗಳೂ ಚೀನಾ ಜೊತೆ ಸೇರಿಕೊಳ್ಳಬಹುದು. ಇತ್ತ ಅಮೆರಿಕದ ಕಂಪನಿಗಳು ಆರ್ಥಿಕ ಕುಸಿತದ ಸುಳಿಯಲ್ಲಿವೆ. ದೇಶದಲ್ಲಿ ನಿರುದ್ಯೋಗ ತಾಂಡವವಾಡುತ್ತಿದೆ. ಆದರೆ ತೈಲ ದೇಶಗಳ ಮೇಲೆ ಅಮೆರಿಕ ಹಿಡಿತ ಹೊಂದಿದೆ. ಕೊರೊನಾದಿಂದಾಗಿ ಜಾಗತಿಕ ದೇಶಗಳ ಆಕ್ರೋಶ ಚೀನಾದ ಕಡೆಗಿದೆ.
