ಯುವಜನ ಕಡಿಮೆಯಾಗುತ್ತಿದ್ದಾರೆ

ದೇಶದ ಜನಸಂಖ್ಯೆಯ ಅರ್ಧಕ್ಕಿಂತಲೂ ಹೆಚ್ಚು ಮಂದಿ 25ಕ್ಕಿಂತ ಹೆಚ್ಚು ವಯಸ್ಸಿನವರು!

ಇತಿಹಾಸದಲ್ಲೇ ವೊತ್ತ ವೊದಲ ಬಾರಿಗೆ, ಭಾರತದ ಅರ್ಧಕ್ಕಿಂತಲೂ ಹೆಚ್ಚು ಜನಸಂಖ್ಯೆ ಈಗ 25 ವರ್ಷದವರು ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸಿನವರು. ಪುರುಷ- ಸ್ತ್ರೀ ಎಂಬ ವ್ಯತ್ಯಾಸವಿಲ್ಲದೆ, ನಗರ- ಹಳ್ಳಿ ಎಂಬ ವ್ಯತ್ಯಾಸವಿಲ್ಲದ ಸರಾಸರಿ ಚಿತ್ರಣ ಹೀಗಿದೆ. ಭಾರತೀಯ ರಿಜಿಸ್ಟ್ರಾರ್‌ ಜನರಲ್‌ ಮತ್ತು ಜನಗಣತಿ ಕಮಿಷನರ್‌ ನಡೆಸಿದ ಮಾದರಿ ನೋಂದಣಿ ವ್ಯವಸ್ಥೆ-2018ರ ವರದಿಯಲ್ಲಿ ಈ ವಿಚಾರ ಕಂಡುಬಂದಿದೆ.

ಇದರಿಂದ ಏನು ತಿಳಿಯಬಹುದು? ಏನೆಂದರೆ, ಭಾರತದ ಜನಸಂಖ್ಯೆ ಹೆಚ್ಚು ಹೆಚ್ಚು ಮಧ್ಯವಯಸ್ಕವಾಗುತ್ತಿದೆ. ಭಾರತದ ಫಲವತ್ತತೆ ಸೂಚ್ಯಂಕ ಕಡಿಮೆಯಾಗುತ್ತಿದೆ; ಆಯುರ್ಮಾನ ಹೆಚ್ಚುತ್ತಿದೆ. ಹೀಗಾಗಿ ಯುವಜನತೆಯ ಪ್ರಮಾಣ ಕಡಿಮೆಯಾಗಿ ಮಧ್ಯವಯಸ್ಸಿನವರ ಸಂಖ್ಯೆ ಏರುತ್ತಿದೆ. ಗ್ರಾಮೀಣ ಪ್ರದೇಶದ ಗಂಡಸರಲ್ಲೂ 25 ವರ್ಷಕ್ಕಿಂತ ಕೆಳಗಿನವರ ಪ್ರಮಾಣ 2017ರಲ್ಲಿ 50.2% ಇದ್ದುದು 2018ರಲ್ಲಿ 49.9%ಕ್ಕೆ ಇಳಿದಿತ್ತು .

ಇತರರಲ್ಲೂ ಗ್ರಾಮೀಣ ಸ್ತ್ರೀ , ನಗರದ ಪುರುಷ ಹಾಗೂ ನಗರದ ಸ್ತ್ರೀಯರಲ್ಲೂ 25 ವರ್ಷಕ್ಕಿಂತ ಕೆಳಗಿನವರ ಜನಸಂಖ್ಯೆ ಒಟ್ಟಾರೆ ಜನಸಂಖ್ಯೆಯ ಶೇ 50ಕ್ಕಿಂತ ಕಡಿಮೆ ಇದೆ. 2018ನೇ ಇಸವಿಯಲ್ಲಿ ದೇಶದ ಒಟ್ಟಾರೆ ಜನಸಂಖ್ಯೆಯಲ್ಲಿ 25 ವರ್ಷಕ್ಕಿಂತ ಕಡಿಮೆ ಪ್ರಾಯದವರು ಶೇ. 46.9 ಮಾತ್ರ.

ಆದರೆ ಇದರಲ್ಲಿ ರಾಜ್ಯದಿಂದ ರಾಜ್ಯಕ್ಕೆ ವ್ಯತ್ಯಾಸವಿದೆ. ಉತ್ತರ ಭಾರತದ ಕೆಲವು ರಾಜ್ಯಗಳಲ್ಲಿ ಕಡಿಮೆ ವಯೋಮಾನದವರು ಹೆಚ್ಚಿದ್ದರೆ, ದಕ್ಷಿಣ ಭಾರತದ ಹಲವು ರಾಜ್ಯಗಳಲ್ಲಿ ಹೆಚ್ಚಿನ ವಯಸ್ಸಿನವರು ಹೆಚ್ಚಿದ್ದಾರೆ. ಇದಕ್ಕೆ ಕಾರಣ ಉತ್ತರದ ರಾಜ್ಯಗಳ ಫಲವತ್ತತೆ ದರ ಹೆಚ್ಚು ಇರುವುದು.

ಬಿಹಾರದ ಫಲವತ್ತತೆ ದರ ದೇಶದಲ್ಲೇ ಹೆಚ್ಚು , 3.2ರಷ್ಟಿದೆ. ಇಲ್ಲಿ 25 ವರ್ಷ ಹಾಗೂ ಅದಕ್ಕಿಂತ ಕಡಿಮೆ ಪ್ರಾಯದವರ ಸಂಖ್ಯೆ ಅಧಿಕ 57.2 ಶೇಕಡ. ನಂತರದ ಸ್ಥಾನ ಉತ್ತರಪ್ರದೇಶದ್ದು . ಇಲ್ಲಿನ ಫಲವತ್ತತೆ ದರ 2.9 ಹಾಗೂ 25 ವರ್ಷಕ್ಕಿಂತ ಕಡಿಮೆ ಪ್ರಾಯದವರ ಪ್ರಮಾಣ 52.7 ಶೇಕಡ. ರಾಜ್ಯಗಳು ಹೆಚ್ಚು ಹೆಚ್ಚು ಕಾಲ ಫಲವತ್ತತೆ ದರವನ್ನು ಕಡಿಮೆ ಮಾಡಿಕೊಂಡಷ್ಟೂ ಹಾಗೂ ಆಯುರ್ಮಾನವನ್ನು ಜಾಸ್ತಿ ಮಾಡಿಕೊಂಡಷ್ಟೂ, 25 ವರ್ಷಕ್ಕಿಂತ ಕಡಿಮೆ ಪ್ರಾಯದವರ ಸಂಖ್ಯೆ ಕಡಿಮೆಯಾಗುತ್ತಾ ಹೋಗುತ್ತಿದೆ. ಇದನ್ನು ಕೇರಳ ರಾಜ್ಯದ ನಿದರ್ಶನದಲ್ಲಿ ನೋಡಬಹುದು. ಕೇರಳ ರಾಜ್ಯದಲ್ಲಿ ಫಲವತ್ತತೆ ದರ 1.7ರಷ್ಟು ಕೆಳಕ್ಕೆ ಇಳಿದಿದೆ. ಇಲ್ಲಿನ 25 ವರ್ಷಕ್ಕಿಂತ ಕೆಳಗಿನವರ ಪ್ರಮಾಣ ಜನಸಂಖ್ಯೆಯ ಮೂರನೇ ಒಂದು ಭಾಗಕ್ಕಿಂತ ಕೊಂಚ ಹೆಚ್ಚು , ಅಂದರೆ 37.4 ಶೇಕಡದಷ್ಟಿದೆ. ತಮಿಳುನಾಡು, ಆಂದ್ರಪ್ರದೇಶ, ತೆಲಂಗಾಣ, ಜಮ್ಮು ಕಾಶ್ಮೀರ, ಹಿಮಾಚಲ ಹಾಗೂ ಪಂಜಾಬ್‌ಗಳ ಫಲವತ್ತತೆ ದರ ಈಗ ಕೇರಳಕ್ಕಿಂತಲೂ ಕೆಳಕ್ಕಿಳಿದಿದ್ದು , 1.6ರಷ್ಟಿದೆ. ಆದರೆ ಇವುಗಳ ಯುವಜನ ಪ್ರಮಾಣ ಕೇರಳಕ್ಕಿಂತ ಹೆಚ್ಚು ಇದೆ. ಯಾಕೆಂದರೆ ಕೇರಳದ ಫಲವತ್ತತೆ ದರ 1991ರಿಂದಲೇ 1.8ಕ್ಕೆ ಇಳಿದಿದ್ದು , ಆ ದರವನ್ನು ಕಾಪಾಡಿಕೊಂಡು ಬಂದಿದೆ. ಈ ರಾಜ್ಯಗಳ ಫಲವತ್ತತೆ ದರ 1991ರ ಅವಧಿಯಲ್ಲಿ 3ರಷ್ಟಿದ್ದು , ಇತ್ತೀಚೆಗೆ 1.6ಕ್ಕೆ ಇಳಿದಿದೆ.

ಇಲ್ಲಿ ಗಮನಿಸಲಾಗಿರುವ ಇನ್ನೊಂದು ವಿಚಿತ್ರ ಸಂಗತಿ ಎಂದರೆ, ನಗರ ಪ್ರದೇಶದಲ್ಲಿ ಫಲವತ್ತತೆ ದರ ಕಡಿಮೆ ಹಾಗೂ ಹಳ್ಳಿ ಪ್ರದೇಶದಲ್ಲಿ ಹೆಚ್ಚು ಇದೆ; ಹೀಗಾಗಿ ಯುವಜನ ಸಂಖ್ಯೆ ಪ್ರಮಾಣ ಹಳ್ಳಿಗಳಲ್ಲಿ ಹೆಚ್ಚಿದೆ ಹಾಗೂ ನಗರಗಳಲ್ಲಿ ಕಡಿಮೆ ಇದೆ.

ಈ ಅಂಕಿ ಸಂಖ್ಯೆಗಳನ್ನು ಪ್ರಭಾವಿಸುವಲ್ಲಿ ಇನ್ನೊಂದು ಅಂಶವೂ ಇರಬಹುದು. ಗ್ರಾಮಾಂತರ ಪ್ರದೇಶಗಳಿಂದ ನಗರಗಳಿಗೆ ಯಾವಾಗಲೂ ವಲಸೆ ನಡೆಯುತ್ತಲೇ ಇರುತ್ತದೆ. ಮಹಿಳೆಯರಲ್ಲಿ ಸರಾಸರಿ ಆಯುರ್ಮಾನ ಪ್ರಮಾಣ ಹೆಚ್ಚು ಇದೆ, ಕೆಲವು ರಾಜ್ಯಗಳಲ್ಲಿ ವರ್ಷಾಂತರಗಳಿಂದ ಲಿಂಗಾನುಪಾತದಲ್ಲಿ ಮಹಿಳೆಯರ ಪ್ರಮಾಣ ಕಡಿಮೆ; ಹೀಗಾಗಿ 25 ವರ್ಷದೊಳಗಿನ ಯುವಜನ ಪ್ರಮಾಣದಲ್ಲಿ ಸ್ತ್ರೀಯರ ಸಂಖ್ಯೆ ಕಡಿಮೆಯದಾಗಿ ಕಾಣುತ್ತಿದೆ. ರಾಷ್ಟ್ರೀಯ ಸರಾಸರಿ ತೆಗೆದರೆ 25 ವರ್ಷದೊಳಗಿನ ಸ್ತ್ರೀಯರ ಪ್ರಮಾಣ ಶೇ.46.3 ಇದೆ; ಪುರುಷರ ಪ್ರಮಾಣ ಶೇ.47.4 ಇದೆ.

Hariprakash Konemane
Hariprakash Konemane

ARCHIVES

SUBSCRIBE

Get latest updates on your inbox, subscribe to my newsletter

[subscribe2 hide="unsubscribe"]
 

Back To Top