ಗೊಗೊಯಿ ನೇಮಕ ತಾಂತ್ರಿಕವಾಗಿ ಸರಿ, ನೈತಿಕವಾಗಿ?

ಗೊಗೊಯಿ ನೇಮಕ ತಾಂತ್ರಿಕವಾಗಿ ಸರಿ, ನೈತಿಕವಾಗಿ?
ಇಂಥ ನೇಮಕಗಳನ್ನು ಹಿಂದೆ ಸ್ವತಃ ಗೊಗೊಯಿ ವಿರೋಧಿಸಿದ್ದರು/ ಲೈಂಗಿಕ ದೌರ್ಜನ್ಯ ಆರೋಪವೂ ಅವರ ಮೇಲಿದೆ

– ಹರಿಪ್ರಕಾಶ್‌ ಕೋಣೆಮನೆ

ಸುಪ್ರೀಂ ಕೋರ್ಟಿನ ಮಾಜಿ ಮುಖ್ಯ ನ್ಯಾಯಮೂರ್ತಿ ರಂಜನ್‌ ಗೊಗೊಯಿ ರಾಜ್ಯಸಭೆಗೆ ನಾಮ ನಿರ್ದೇಶನಗೊಂಡ ಬಳಿಕ ಇದೇ ಮೊದಲ ಬಾರಿಗೆ ಪರ-ವಿರೋಧದ ದೊಡ್ಡ ಚರ್ಚೆಯೇ ನಡೆಯುತ್ತಿದೆ. ಐತಿಹಾಸಿಕ ಎಂಬಂತೆ ಗೊಗೊಯಿ ಪ್ರಮಾಣ ವಚನದ ವೇಳೆ ರಾಜ್ಯಸಭೆಯಲ್ಲಿ ಕಾಂಗ್ರೆಸ್‌ ಸಭಾತ್ಯಾಗ ಮಾಡಿ ಪ್ರತಿಭಟಿಸಿದೆ. ಈ ಹಿಂದೆಯೂ ಯುಪಿಎ ಸರಕಾರದ ಅವಧಿಯಲ್ಲೂ ಸುಪ್ರೀಂ ಕೋರ್ಟಿನ ಬಹಳಷ್ಟು ನ್ಯಾಯಮೂರ್ತಿಗಳು ನಿವೃತ್ತಿಯ ಬಳಿಕ, ಪ್ರಭುತ್ವ ಪೋಷಿತ ಅಧಿಕಾರ ಸ್ಥಾನ-ಮಾನಗಳನ್ನು ಪಡೆದು, ಆ ಎಲ್ಲವನ್ನೂ ಭರ್ಜರಿಯಾಗಿಯೇ ಅನುಭವಿಸಿದ್ದಾರೆ. ಆಗಲೂ ನಿವೃತ್ತ ನ್ಯಾಯಮೂರ್ತಿಗಳ ಕುರಿತು ಇಂಥ ಚರ್ಚೆ ನಡೆದಿದೆ. ಆದರೆ, ಈ ಹೊತ್ತಿನ ಚರ್ಚೆ ಬಹಳ ಮುಖ್ಯ ಏಕೆಂದರೆ, ಇಂಥ ನೇಮಕಗಳನ್ನು ಗೊಗೊಯಿ ನ್ಯಾಯಸ್ಥಾನದಲ್ಲಿ ಕುಳಿತು ಬಲವಾಗಿ ವಿರೋಧಿಸಿದ್ದರು. 2018ರಲ್ಲಿ ಐವರು ನ್ಯಾಯಮೂರ್ತಿಗಳನ್ನು ಒಳಗೊಂಡ ನ್ಯಾಯಪೀಠದ ಅಧ್ಯಕ್ಷತೆ ವಹಿಸಿದ್ದ ಗೊಗೊಯಿ, ನಿವೃತ್ತಿಯ ಬಳಿಕ ನ್ಯಾಯಮೂರ್ತಿಗಳಿಗೆ ಅಧಿಕಾರ ನೀಡುವುದು, ಸ್ವತಂತ್ರ ನ್ಯಾಯಾಂಗಕ್ಕೆ ಮಾಡುವ ಅಪಚಾರ ಎಂದು ಹೇಳಿದ್ದರು! ಪಕ್ಷಪಾತವಿಲ್ಲದ ನ್ಯಾಯಮೂರ್ತಿಗಳು ಮತ್ತು ಸದ್ದು ಮಾಡುವ ಕ್ರಿಯಾಶೀಲ ಪತ್ರಕರ್ತರು ಪ್ರಜಾಪ್ರಭುತ್ವದ ಮೊದಲ ಹಂತದ ರಕ್ಷಕರು ಎಂಬುದು ಕೂಡ ಗೊಗೊಯಿ ಅವರ ಮತ್ತೊಂದು ನ್ಯಾಯೋಚಿತ ಆಣಿಮುತ್ತು. ಗೊಗೊಯಿ ಇಂಥ ನೈತಿಕ ಬೋಧನೆಯ ಕಾರಣವೂ ಸೇರಿದಂತೆ, ಕೆಲವು ಮೂಲಭೂತ ಸಂಗತಿಗಳನ್ನು ಚರ್ಚಿಸುವುದು ಅಗತ್ಯವಾಗಿದೆ. ಹಾಗಾದರೆ ನೇಮಕದ ವಿಷಯದಲ್ಲಿ ಯಾವೆಲ್ಲ ಸಂಗತಿಗಳನ್ನು ನಾವು ಪರಾಮರ್ಶೆ ಮಾಡಬೇಕಿದೆ?
ಮೊದಲನೆಯದ್ದು, ಬಿಜೆಪಿ ಒಂದು ರಾಜಕೀಯ ಪಕ್ಷ ವಾಗಿ ಪ್ರತಿಪಕ್ಷದಲ್ಲಿದ್ದಾಗ ಹಾಗೂ ಆಡಳಿತ ನಡೆಸುವ ಪಕ್ಷವಾಗಿ ಇಂಥ ನೇಮಕಗಳ ಕುರಿತು ತಾಳಿರುವ ನಿಲುವು ಹೇಗಿದೆ ಮತ್ತು ಹೇಗಿರಬೇಕಿತ್ತು ಎಂಬುದನ್ನು ನೋಡೋಣ. ಅದನ್ನು ಒಂದು ಒಳ್ಳೆಯ ನಿದರ್ಶನದ ಮೂಲಕ ಅವಲೋಕಿಸೋಣ. ಆಗಿನ ಕಾಂಗ್ರೆಸ್‌ ನೇತೃತ್ವದ ಯುಪಿಎ ಸರಕಾರ ನಿವೃತ್ತ ನ್ಯಾಯಾಧೀಶರೊಬ್ಬರ ನೇಮಕಕ್ಕೆ ಸಂಬಂಧಿಸಿದಂತೆ, ಈಗ ರೈಲ್ವೆ ಸಚಿವರಾಗಿರುವ ಬಿಜೆಪಿಯ ಪಿಯೂಷ್‌ ಗೋಯೆಲ್‌ ಅವರು 2013ರ ಸೆಪ್ಟೆಂಬರ್‌ 9ರಂದು ಹೀಗೆ ಒಂದು ಟ್ವೀಟ್‌ ಮಾಡಿದ್ದರು. “We’ve gone too far in creating post -retirement avenues for judges. Desire of a post-retirement job influences pre-retirement judgements ’’’’
ಅಂದರೆ ನಿವೃತ್ತ ನ್ಯಾಯಮೂರ್ತಿಗಳ ಯಾವುದೇ ರೀತಿಯ ನೇಮಕವು, ನಿವೃತ್ತಿಯ ಅಂಚಿನಲ್ಲಿರುವ ನ್ಯಾಯಮೂರ್ತಿಗಳನ್ನು ಪ್ರಭಾವಿಸುತ್ತದೆ! ಇದು ಸಾರ್ವಕಾಲಿಕವಾಗಿ ಎಲ್ಲರೂ ಒಪ್ಪಬಹುದಾದ ಅಭಿಪ್ರಾಯ. ಸರಕಾರ ನಡೆಸುವವರು ಹಾಗೂ ದೇಶದ ನ್ಯಾಯಾಂಗ ವ್ಯವಸ್ಥೆಯ ಉನ್ನತ ವ್ಯಕ್ತಿಗಳು ಈ ಮಾತನ್ನು ಯಾವುದೇ ಮುಲಾಜೂ ಇಲ್ಲದೆ ಶಾಶ್ವತವಾಗಿ ಅನುಸರಿಸಬೇಕಾದ ನಿಲುವನ್ನು ಅವರು ತಮ್ಮ ಟ್ವೀಟ್‌ನಲ್ಲಿ ಪ್ರತಿಪಾದಿಸಿದ್ದರು.
ಸುಪ್ರೀಂ ಕೋರ್ಟ್‌ ಇಲ್ಲವೇ ಹೈಕೋರ್ಟ್‌ನಿಂದ ನಿವೃತ್ತರಾಗುವ ಹಿರಿಯ ನ್ಯಾಯಾಧೀಶರನ್ನು, ನಿವೃತ್ತಿಯ ಬೆನ್ನಲ್ಲಿಯೇ ಉನ್ನತ ರಾಜಕೀಯ ಸ್ಥಾನಕ್ಕೆ ನೇಮಕ ಮಾಡುವುದರಿಂದ, ಸೇವೆಯಲ್ಲಿರುವ ನ್ಯಾಯಾಧೀಶರು ಅದರಿಂದ ಪ್ರಭಾವಿತರಾಗುತ್ತಾರೆ. ಆಳುವ ಸರಕಾರದ ಪರವಾಗಿ ನ್ಯಾಯ ತೀರ್ಮಾನ ಮಾಡಿದರೆ, ಮುಂದೆ ಅನುಕೂಲವಾಗುತ್ತದೆ, ಭವಿಷ್ಯಕ್ಕೆ ಒಳ್ಳೆಯದಾಗುತ್ತದೆ ಎಂಬ ಭಾವನೆ ಬೆಳೆಯುತ್ತದೆ ಎಂದು ಗೋಯೆಲ್‌ ಅಂದು ಹೇಳಿದ್ದರು. ಈ ಟ್ವೀಟ್‌ನ ಅಭಿಪ್ರಾಯವನ್ನು ರಂಜನ್‌ ಗೊಗೊಯಿ ಅವರನ್ನು ರಾಜ್ಯಸಭೆಗೆ ನಾಮಕರಣ ಮಾಡಲು ಶಿಫಾರಸು ಮಾಡಿದ ಪ್ರಭುತ್ವ ಮರೆಯಬಾರದಿತ್ತು.
ಇನ್ನು ರಂಜನ್‌ ಗೊಗೊಯಿ ನೇಮಕದ ಸುತ್ತ ಹುಟ್ಟಿಕೊಂಡಿರುವ ವಿವಾದದ ವಿಚಾರಕ್ಕೆ ಬರೋಣ.
Caesar’s Wife Must Be Above Suspicion ಎಂಬುದು ಇಂಗ್ಲಿಷ್‌ ನಾಟಕದ ಒಂದು ಪ್ರಸಿದ್ಧ ಮಾತು. ಗೊಗೊಯಿ ನ್ಯಾಯಮೂರ್ತಿಯಾಗಿ ಸೇವೆಯಲ್ಲಿರುವಾಗ ನಡೆದ ಪ್ರಕರಣವನ್ನು ಭಿತ್ತಿಯಾಗಿಟ್ಟುಕೊಂಡು ಈ ಮಾತನ್ನು ನೆನಪಿಸಿಕೊಳ್ಳೋಣ. ‘‘2018ರ ಅಕ್ಟೋಬರ್‌ 10 ಮತ್ತು 11ರಂದು ಸುಪ್ರೀಂಕೋರ್ಟ್‌ ಮುಖ್ಯ ನ್ಯಾಯಮೂರ್ತಿಗಳ ಗೃಹ ಕಚೇರಿಯಲ್ಲಿ ಕೆಲಸ ಮಾಡುವ ವೇಳೆ ಘನತೆವೆತ್ತರಿಂದಲೇ ನನಗೆ ಲೈಂಗಿಕ ಕಿರುಕುಳ ನಡೆಯಿತು,’’ ಎಂದು ಸುಪ್ರೀಂ ಕೋರ್ಟಿನ ಮಹಿಳಾ ಸಿಬ್ಬಂದಿಯೊಬ್ಬರು ರಂಜನ್‌ ಗೊಗೊಯಿ ವಿರುದ್ಧವೇ ದೂರು ಪತ್ರ ಬರೆದರು. ಆ ಸಂದರ್ಭದಲ್ಲಿ ಗೊಗೊಯಿ ಅವರು ತಾನು ಈ ಕಳಂಕದಿಂದ ಮುಕ್ತನಾಗುವವರೆಗೂ ಈ ಪೀಠದಲ್ಲಿ ಮುಂದುವರಿಯುವುದಿಲ್ಲ ಎಂದು ಘೋಷಿಸುತ್ತಾರೆ ಎಂದೇ ಎಲ್ಲರೂ ನಂಬಿದ್ದರು. ದೊಡ್ಡವರು ಅನುಸರಿಸಲೇಬೇಕಾದ ಮೇಲ್ಪಂಕ್ತಿಯೂ ಅದೇ ಆಗಿತ್ತು. ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, ಗೊಗೊಯಿ ಅವರು ಈ ವಿಷಯದಲ್ಲಿ ಉನ್ನತ ಮಟ್ಟದ ತನಿಖೆ ನಡೆಸಿ ಸತ್ಯಾಂಶ ತೆರೆದಿಡುವಂತೆ ಸರಕಾರಕ್ಕೂ ಕೋರಬಹುದಿತ್ತು. ಹಾಗೆ ಮಾಡಿದ್ದರೆ ಸುಪ್ರೀಂ ಕೋರ್ಟ್‌ ಹಾಗೂ ಮುಖ್ಯ ನ್ಯಾಯಮೂರ್ತಿಯವರ ಸ್ಥಾನಮಾನದ ಗೌರವ ಇನ್ನೂ ಎತ್ತರಕ್ಕೆ ಹೋಗುತ್ತಿತ್ತು. ಆದರೆ ಗೊಗೊಯಿ ಅವರು ಆ ರೀತಿ ಮಾಡುವ ಬದಲು, ಬೇರೆ ಮಾರ್ಗ ತುಳಿದಿದ್ದು ಎಲ್ಲರಿಗೂ ಗೊತ್ತಿದೆ.
ತಮ್ಮ ವಿರುದ್ಧದ ಲೈಂಗಿಕ ಆರೋಪವನ್ನು ಅಲ್ಲಗಳೆದರು. ಇದರ ಹಿಂದೆ ಕುತಂತ್ರ, ಷಡ್ಯಂತ್ರ ಇದೆ ಎಂದು ಸಂಚಿನ ಕಥೆ ಹೇಳಿದರು. ಅಷ್ಟೇ ಅಲ್ಲ ನ್ಯಾಯಪೀಠದಲ್ಲಿ ಕುಳಿತು ತಮ್ಮ ಮೇಲಿನ ಆರೋಪ ಸತ್ಯಕ್ಕೆ ದೂರ ಎಂದು ತಾವೇ ತೀರ್ಮಾನ ಕೈಗೊಂಡರು. ಆರೋಪಿತ ಘನತೆವೆತ್ತರೇ ತಮ್ಮನ್ನು ನಾವು ನಿರ್ದೋಷಿ ಎಂದು ನ್ಯಾಯ ತೀರ್ಮಾನ ನೀಡಿದ ಈ ಪ್ರಕರಣ, ನನಗೆ ಗೊತ್ತಿರುವಂತೆ ನ್ಯಾಯಾಲಯಗಳ ಇತಿಹಾಸದಲ್ಲಿಯೇ ವಿರಳಾತಿ ವಿರಳ.
‘‘ನನ್ನ ಮೇಲಿನ ಆರೋಪದ ಬಗ್ಗೆ ಭಯವಿಲ್ಲದೆ ನನ್ನ ಕರ್ತವ್ಯ ಮಾಡುತ್ತೇನೆ. ನನ್ನ ಅಧಿಕಾರಾವಧಿ ಮುಗಿಯುವವರೆಗೆ ಯಾವುದೇ ಭಯವಿಲ್ಲದೆ ನನ್ನ ಕೆಲಸ ಮಾಡುತ್ತೇನೆ. ಇದು ನ್ಯಾಯಾಂಗವನ್ನು ಬಲಿಪಶು ಮಾಡುವ ಹುನ್ನಾರ,’’ ಎಂದು ತಮ್ಮ ಮೇಲಿನ ಆರೋಪಕ್ಕೆ ಷರಾ ಬರೆದರು. ಗೊಗೊಯಿ ಪ್ರಾಮಾಣಿಕರೇ ಇರಬಹುದು. ಅವರ ಅಭಿಪ್ರಾಯ ಸರಿಯೇ ಇರಬಹುದು. ಆದರೆ ಅವರ ವಿರುದ್ಧ ಕೇಳಿಬಂದ ಆರೋಪಕ್ಕೆ ತೀರ್ಮಾನ ನೀಡುವವರು ಯಾರು? ತಾಂತ್ರಿಕವಾಗಿ ಇದು ಸರಿಯೇ ಇದ್ದರೂ, ನೈತಿಕವಾಗಿ ಇದನ್ನು ಯಾವ ಸೀಮೆಯ ನ್ಯಾಯ ವ್ಯವಸ್ಥೆ ಎಂದು ವ್ಯಾಖ್ಯಾನಿಸೋಣ. ಇಂಥ ನ್ಯಾಯ ನಿಷ್ಕರ್ಷೆಯ ವ್ಯವಸ್ಥೆಗೆ ಹಾಗೂ ಸ್ಥಾಪಿತ ತನಿಖಾ ವ್ಯವಸ್ಥೆಗೆ ಅರ್ಥವೇ ಇರುವುದಿಲ್ಲ. ಆ ಹಿನ್ನೆಲೆಯಿಂದ ನೋಡಿದರೆ ಗೊಗೊಯಿ ನಡವಳಿಕೆ ಯಾವುದೇ ಉನ್ನತ ಸ್ಥಾನದಲ್ಲಿರುವ ವ್ಯಕ್ತಿಗಳಿಗೆ ಭೂಷಣ ಪ್ರಾಯ ಅಲ್ಲವೇ ಅಲ್ಲವೇ ಅಲ್ಲ. ಸೀಜರನ ಮಾತಿಗೆ ಮತ್ತೆ ಮರಳುವುದಾದರೆ, ಇಲ್ಲಿ ಗೊಗೊಯಿ ಅವರೇ ಬಹುದೊಡ್ಡ ಸಂಶಯಾಸ್ಪದ ಮನುಷ್ಯರಾಗಿದ್ದರು!
ಈ ಪ್ರಕರಣವನ್ನು ನ್ಯಾಯಾಂಗ ವ್ಯವಸ್ಥೆ ಬೋಧಿಸುವ ಸಹಜ ನ್ಯಾಯದ(ಪ್ರಿನ್ಸಿಪಲ್‌ ಆಫ್‌ ನ್ಯಾಚುರಲ್‌ ಜಸ್ಟೀಸ್‌) ದೃಷ್ಟಿಯಿಂದ ನೋಡುವುದು ಮುಖ್ಯ.
1. ಅಪರಾಧ ಎಷ್ಟೇ ಗುರುತರವಾಗಿದ್ದರೂ ಅಪರಾಧ ಎಸಗಿರುವವನಿಗೆ ತನ್ನನ್ನು ತಾನು ವಕೀಲರ ಮೂಲಕ ಸಮರ್ಥಿಸಿಕೊಳ್ಳಲು ಅವಕಾಶ ಕೊಡಬೇಕು. ಗೊಗೊಯಿ ವಿರುದ್ಧ ಆರೋಪ ಮಾಡಿರುವ ಮಹಿಳೆಗೆ ಈ ಅವಕಾಶ ನಿರಾಕರಿಸಲಾಯಿತು. ನ್ಯಾಯ ವ್ಯವಸ್ಥೆಯಲ್ಲಿ ವಿಚಾರಣೆ, ತನಿಖೆಗಳು ನಡೆಯಲೇ ಇಲ್ಲ.
2. ಆರೋಪಿ ಸ್ಥಾನದಲ್ಲಿರುವವನು ತಾನೇ ನ್ಯಾಯ ತೀರ್ಮಾನವನ್ನೂ ಆ ಪ್ರಕರಣದಲ್ಲಿ ಮಾಡಬಾರದು. ವಿಚಾರಣೆಗೆ ಆಸ್ಪದ ಕೊಡುವ ಬದಲು ಆರೋಪ ಬಂದ ತಕ್ಷ ಣ ನ್ಯಾಯತೀರ್ಮಾನವನ್ನೂ ಗೊಗೊಯಿ ಮಾಡಿಬಿಟ್ಟರು. ಇಂಥವರು ರಾಜ್ಯಸಭೆ ಸದಸ್ಯರಾಗಿ ಎಂಥ ನಡವಳಿಕೆ ಪ್ರದರ್ಶಿಸಬಹುದು?
ಈ ಸಂದರ್ಭದಲ್ಲಿ, ಬಿಜೆಪಿ ಹಿರಿಯ ನಾಯಕ ಎಲ್‌.ಕೆ.ಆಡ್ವಾಣಿ ಅವರು ಜೈನ್‌ ಹವಾಲಾ ಹಗರಣ ಹೊರಬಂದಾಗ ನಡೆದುಕೊಂಡ ರೀತಿಯನ್ನು ಗೊಗೊಯಿ ಮತ್ತು ಅವರನ್ನು ರಾಜ್ಯಸಭೆಗೆ ನೇಮಕ ಮಾಡಿದವರು ನೆನಪಿಸಿಕೊಳ್ಳಲಿ. 1996ರಲ್ಲಿ ಜೈನ್‌ ಹವಾಲಾ ಹಗರಣ ದೊಡ್ಡ ಸದ್ದು ಮಾಡಿತ್ತು. ಕಾಶ್ಮೀರದ ಇಂಡಿಯನ್‌ ಮುಜಾಹಿದೀನ್‌ ಉಗ್ರಗಾಮಿ ಸಂಘಟನೆಗೆ ಸೇರಿದ್ದ ಅಶಾಧಿಕ್‌ ಹುಸೇನ್‌ ಲೋನ್‌ ಎಂಬ ಉಗ್ರನನ್ನು ದಿಲ್ಲಿ ಪೊಲೀಸರು ಬಂಧಿಸಿದ್ದರು. ಬಂಧಿತ ಉಗ್ರನಿಂದ ವಶಪಡಿಸಿಕೊಳ್ಳಲಾದ ಡೈರಿಯಲ್ಲಿ , ಹವಾಲಾ ದಂಧೆ ನಡೆಸುತ್ತಿದ್ದ ಸುರೇಂದ್ರಕುಮಾರ್‌ ಜೈನ್‌ ಎಂಬಾತ ತಾನು ಇಂತಿಂಥ ರಾಜಕೀಯ ನೇತಾರರಿಗೆ ವಂತಿಗೆ ನೀಡುತ್ತಿದ್ದೇನೆ ಎಂದು ಕೆಲವು ಹೆಸರುಗಳನ್ನು ಕೋಡ್‌ ವರ್ಡ್‌ಗಳಲ್ಲಿ ಪಟ್ಟಿ ಮಾಡಿದ್ದ. ಅಂಥ ಹೆಸರುಗಳ ಪೈಕಿ ಎಲ್‌ಕೆ ಎಂಬ ಹೆಸರು ಹಾಗೂ ಅದರ ಮುಂದೆ 1 ಲಕ್ಷ ರೂ. ಎಂದು ನಮೂದಾಗಿತ್ತು. ಈ ಎಲ್‌ಕೆ ಎಂದರೆ, ಎಲ್‌. ಕೆ. ಆಡ್ವಾಣಿ ಎಂದು ಊಹಾತ್ಮಕ ಚರ್ಚೆ ಶುರುವಾಯಿತು. ಆಗ ಲೋಕಸಭೆಯಲ್ಲಿ ಪ್ರತಿಪಕ್ಷ ಸದಸ್ಯರಾಗಿದ್ದ ಆಡ್ವಾಣಿ ಅವರು ಒಂದು ಕ್ಷಣವೂ ಯೋಚಿಸದೆ ಲೋಕಸಭಾ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದರು. ಕಳಂಕ ಮುಕ್ತನಾಗುವವರೆಗೆ ಮತ್ತೆ ಲೋಕಸಭೆಯ ಹೊಸ್ತಿಲು ತುಳಿಯಲಾರೆ ಎಂದು ಶಪಥ ಮಾಡಿದರು. ಆಡ್ವಾಣಿ ಅವರ ಮೇಲಿನ ಆರೋಪಕ್ಕೆ ಗುಲಗುಂಜಿಯಷ್ಟೂ ಸಾಕ್ಷ್ಯಾಧಾರಗಳಿಲ್ಲ ಎಂದು ಕೋರ್ಟ್‌ ಹೇಳಿದ ಬಳಿಕ ಸಾರ್ವತ್ರಿಕ ಚುನಾವಣೆಯಲ್ಲಿ ಗೆದ್ದು ಮತ್ತೆ ಲೋಕಸಭೆ ಪ್ರವೇಶ ಮಾಡಿದರು. ಇದು ಸಾರ್ವಜನಿಕ ಜೀವನದಲ್ಲಿರುವವರಿಗೆ, ಉನ್ನತ ಸ್ಥಾನದಲ್ಲಿರುವವರಿಗೆ ಸಾರ್ವಕಾಲಿಕ ಆದರ್ಶವಾಗಬೇಕು.
ತನ್ನ ನಾಡಿನ ಶ್ರೀಸಾಮಾನ್ಯ ಕಾಯಕ ಬಂಧುವೊಬ್ಬ ಸೀತೆಯ ಮೇಲೆ ಆರೋಪ ಹೊರಿಸಿದಾಗ ಆಕೆಯನ್ನು ಅಗ್ನಿಪರೀಕ್ಷೆಗೆ ಒಡ್ಡಿದ ರಾಮನೂ ಉನ್ನತ ಸ್ಥಾನದಲ್ಲಿರುವರಿಗೆ ಆದರ್ಶ. ರಾಜ್ಯಸಭೆಗೆ ನಾಮಕರಣವಾಗಿರುವ, ರಾಮಮಂದಿರ ಕುರಿತು ಐತಿಹಾಸಿಕ ತೀರ್ಪು ನೀಡಿರುವ ಗೊಗೊಯಿ ಅವರಿಗೆ ರಾಮನ ಆದರ್ಶ ನೆನಪಾಗಬೇಕಿತ್ತು!
ಈ ಹಿಂದೆಯೂ ಇಂಥ ನಿದರ್ಶನಗಳಿವೆ ಎಂದು ಕೆಲವರು ವಾದಿಸುತ್ತಾರೆ. ಹೌದು ಇಂಥ ಮೂರು ನಿದರ್ಶನಗಳಿವೆ. ಜಸ್ಟಿಸ್‌ ರಂಗನಾಥ್‌ ಮಿಶ್ರ ಮತ್ತು ಜಸ್ಟಿಸ್‌ ಬಹರುಲ್‌ ಇಸ್ಲಾಂ ಸೇವೆಯಿಂದ ನಿವೃತ್ತರಾಗಿ ಆರು ವರ್ಷಗಳ ನಂತರ ರಾಜ್ಯಸಭಾ ಸದಸ್ಯರಾದರು. ಜಸ್ಟಿಸ್‌ ಹಿದಾಯತ್‌ ಉಲ್ಲಾ ಅವರು ನಿವೃತ್ತಿಯಾದ 9 ವರ್ಷಗಳ ತರುವಾಯ ಉಪರಾಷ್ಟ್ರಪತಿಯಾಗಿ ರಾಜ್ಯಸಭೆ ಸಭಾಪತಿಯಾಗಿದ್ದರು. ಹೀಗಾಗಿ ಈ ನೇಮಕಗಳ ಜತೆಗೆ ರಂಜನ್‌ ಗೊಗೊಯಿ ಅವರ ನೇಮಕವನ್ನು ಹೋಲಿಕೆ ಮಾಡುವುದು ಅಷ್ಟು ಸಮಂಜಸವಲ್ಲ.
ನಿಮಗೆ ಗೊತ್ತಿರಲಿ, ಗೊಗೊಯಿ ಅವರು ಅಸ್ಸಾಂನ ಮಾಜಿ ಮುಖ್ಯಮಂತ್ರಿ ಕೇಶವ ಚಂದ್ರ ಗೊಗೊಯಿ ಅವರ ಪುತ್ರ. ಮನಸ್ಸು ಮಾಡಿದ್ದರೆ ಅವರು ಜನರಿಂದಲೇ ನೇರವಾಗಿ ಆಯ್ಕೆಯಾಗಿ ಬರಬಹುದಿತ್ತು. ಆದರೆ, ನಿವೃತ್ತಿಯ ನಾಲ್ಕೇ ತಿಂಗಳ ಅವಧಿಯಲ್ಲಿ ಹಿಂಬಾಗಿಲಿನಿಂದ ಪ್ರವೇಶಿಸಿದರು ಎಂಬುದನ್ನು ಮರೆಯಬಾರದು. ತಮ್ಮ ನೇಮಕದ ಕುರಿತು ಟೀಕೆಗಳಿಗೆ ಪ್ರತಿಕ್ರಿಯೆ ನೀಡಿರುವ ಗೊಗೊಯಿ, ಶಾಸಕಾಂಗ ಮತ್ತು ನ್ಯಾಯಾಂಗ ಹೆಚ್ಚು ಸಮನ್ವಯದಿಂದ ಕೆಲಸ ಮಾಡಬೇಕಾದ ಅಗತ್ಯ ಹಿಂದೆಂದಿಗಿಂತಲೂ ಈಗ ಹೆಚ್ಚಿದೆ. ಹಾಗಾಗಿ ರಾಜ್ಯಸಭಾ ಸದಸ್ಯತ್ವದ ಪ್ರಸ್ತಾಪ ಒಪ್ಪಿಕೊಂಡೆ ಎಂದಿದ್ದಾರೆ. ಆದರೆ, ಈ ರೀತಿ ರಾಜಕೀಯ ಜಾಣ್ಮೆಯ ಹೇಳಿಕೆ ನೀಡುವ ಮೂಲಕ, ತಮಗಿದ್ದ ಅಗಾಧ ಕಾನೂನು ಪಾಂಡಿತ್ಯ ಮತ್ತು ನಿರ್ಣಯಾತ್ಮಕ ಅಭಿಪ್ರಾಯವನ್ನು ಸಾರ್ವಜನಿಕ ಜೀವನದಲ್ಲಿ ದಾಖಲಿಸುವ ಅವಕಾಶವನ್ನೇ ಕಳೆದುಕೊಂಡರು. ರಾಜ್ಯಸಭಾ ಸದಸ್ಯರ ಇತಿಮಿತಿಗಳು ನಮಗೆ ಹೊಸದೇನು?
ಹಾಗಾದರೆ ಗೊಗೊಯಿ ಏನು ಮಾಡಬಹುದಿತ್ತು?
ನಿವೃತ್ತಿಯ ಅಂಚಿನಲ್ಲಿರುವ ನ್ಯಾಯಾಂಗ ಮತ್ತು ಕಾರ್ಯಾಂಗದ ಉನ್ನತ ಅಧಿಕಾರಿಗಳಿಗೆ ಮಾಜಿ ರಾಷ್ಟ್ರಪತಿ ಎಪಿಜೆ ಅಬ್ದುಲ್‌ ಕಲಾಂ ಸಾರ್ವಕಾಲಿಕ ಮಾದರಿ. ರಾಷ್ಟ್ರಪತಿಯಾಗಿ ನಿವೃತ್ತಿಯಾದ ಬಳಿಕ ಬರಿಗೈಲಿ ಹೊರನಡೆದರು. ಕನಿಷ್ಠ ಅವಶ್ಯಕತೆಗಳೊಂದಿಗೆ ಉಳಿದ ಜೀವನ ಕಳೆದರು. ಅದಕ್ಕಿಂತ ಮುಖ್ಯವಾಗಿ ದಿನದ ಹನ್ನೆರಡು ತಾಸು ದೇಶದ ಉದ್ದಗಲಕ್ಕೆ ಶಾಲಾ ಮಕ್ಕಳೊಂದಿಗೆ ತಮ್ಮ ಜ್ಞಾನವನ್ನು ಹಂಚಿಕೊಳ್ಳುವ ಸಂವಾದಗಳಲ್ಲಿ ಕಳೆದರು. ಮಕ್ಕಳೊಂದಿಗೆ ಮಕ್ಕಳಾಗಿ ಹೋದರು. ಮುಂದಿನ ತಲೆಮಾರಿಗೆ ಹೊಸ ಹುಮ್ಮಸ್ಸು ತುಂಬಿದರು. ಹಾಗೇನೆ ಗೊಗೊಯಿ ಅವರು ದೇಶದ ಅತ್ಯುನ್ನತ ನೀತಿ ನಿರ್ಧಾರ ಸಂಸ್ಥೆಗಳಲ್ಲಿ ಕೆಲಸ ಮಾಡಬಹುದಿತ್ತು. ತಮ್ಮದೇ ಸಂಸ್ಥೆ ಶುರು ಮಾಡಬಹುದಿತ್ತು.
ಕಡೆ ಮಾತು: ಹಾಗಾದರೆ ಗೊಗೊಯಿಗೆ ಶಾಶ್ವತ ಶಿಕ್ಷೆ ಆಗಬೇಕೆ? ನಿವೃತ್ತಗೊಂಡ ಕೆಲವೇ ದಿನಗಳಲ್ಲಿ ರಾಜ್ಯಸಭೆಗೆ ನೇಮಕಗೊಂಡಿರುವುದು ಪ್ರಲೋಭನೆಯ ಅನುಮಾನ ಮೂಡಿಸಿದೆ ಎಂಬುದನ್ನು ಹೊರತುಪಡಿಸಿದರೆ, ಅವರನ್ನು ಸದಾ ಅಪರಾಧಿ ಸ್ಥಾನದಲ್ಲಿ ಕೂರಿಸಬೇಕಿಲ್ಲ. ಅಪರಾಧಿ ಮುಂದೆ ಸರಿಯಾಗುತ್ತಾನೆ ಎಂಬ ಭರವಸೆಯೊಂದಿಗೆ ಸ್ವತಃ ಗೊಗೊಯಿ ಅವರೇ ತಮ್ಮ ಸೇವಾವಧಿಯಲ್ಲಿ ಅನೇಕ ತೀರ್ಪನ್ನು ನೀಡಿರಬಹುದು. ಒಮ್ಮೆ ತಪ್ಪಿತಸ್ಥ ಆದವನನ್ನು ಶಾಶ್ವತ ತಪ್ಪಿತಸ್ಥ ಎಂದು ತೀರ್ಮಾನಿಸುವುದು ಸರಿಯಾದ ಕ್ರಮವೂ ಅಲ್ಲ. ಅಂತೆಯೇ ಗೊಗೊಯಿ ಅವರನ್ನೂ ನೋಡೋಣ. ಪಶ್ಚಾತ್ತಾಪವೇ ದೊಡ್ಡ ಪ್ರಾಯಃಶ್ಚಿತ್ತ ಎಂಬುದು ಇಂಡಿಯನ್‌ ಫಿಲಾಸಫಿಯಲ್ಲಿ ಮುಖ್ಯವಾದ ತತ್ವ. ಅಂಗುಲಿಮಾಲನನ್ನು ಸನ್ಯಾಸಿಯಾಗಿಸಿದ ಬುದ್ಧ ಹೇಳಿದ್ದು ಇದನ್ನೇ!

ಓದುಗರ ಒಡಲಾಳ
ಪ್ರಸ್ತುತ ಕೊರೊನಾ ಕಾಯಿಲೆ ಭೀತಿ ಹಲವು ಪಾಠಗಳನ್ನು ಇಡೀ ಜಗತ್ತಿಗೆ ಕಲಿಸಿದೆ. ಕಲಿತ ಪಾಠಗಳನ್ನು ಸದಾ ನೆನಪಿನಲ್ಲಿಟ್ಟುಕೊಂಡರೆ ಮುಂದೆ ಇದಕ್ಕಿಂತಲೂ ಭಯಾನಕ ಪರಿಸ್ಥಿತಿಯನ್ನು ನಾವು ಸಮರ್ಥವಾಗಿ ಎದುರಿಸಬಹುದು. ಅದೆಲ್ಲ ಹೇಗೂ ಇರಲಿ, ಕೊರೊನಾ ಕಾರಣಕ್ಕೆ ನಾವು ಹಾದಿಯಲ್ಲಿ, ಹೋದಲ್ಲಿ ಬಂದಲ್ಲಿ ಉಗುಳುವುದನ್ನು ನಿಲ್ಲಿಸುತ್ತೇವಾ? ಇದೊಂದರಿಂದ ಬಲು ದೊಡ್ಡ ಬದಲಾವಣೆ ತರಲು ಸಾಧ್ಯ!
ನಾಗೇಂದ್ರ ಎಸ್‌, ಮೈಸೂರು

Hariprakash Konemane
Hariprakash Konemane

ARCHIVES

SUBSCRIBE

Get latest updates on your inbox, subscribe to my newsletter

[subscribe2 hide="unsubscribe"]
 

Back To Top